På 30 år har Stord Fitjar Turlag klart å bli eit av dei store innan organisert fritid i kommunane på øya. Gjennom tilboda frå laget har mange fått spreke turvanar, – og godt humør som eit tilleggsgode. NaTURleg då, at 30-årsjubileet vart markert på siste fellesturen denne våren for seniorane som satsar på å vera aktive til 100. Utferda gjekk frå Møllebruo til gapahuken i Stuvikjo, der raudvestkledde vertar baud på framifrå gild marsipankake attåt sterk bålkaffi. Det blei sjølvsagt avsynging av gratulasjonssongen, – med Svein Harald Grov som røysefør oppsongar.
I helsing frå styret sa nestleiar Frank Breistein at mange av dei som var med og skipa Stord Fitjar Turlag i 1994, framleis har glede av å halda kroppen i rørsle med gåing i fellesskap med andre. Seniorgruppa er viktig for laget. Og «Aktiv til 100» er blitt ei suksess, med største avdelinga i Sagvåg/Litlabø som har sine turar til gapahuken ved Hustrudalsvatnet.
