Saklista til komande møte i Utval for byutvikling må kunna seiast å vera spesiell, sidan det skal takast stilling til oppheving av ikkje mindre enn 70 reguleringplanar. Tiltaket blir sett i verk som ein lekk i rulleringa av arealdelen i kommuneplanen.
Innleiingsvis i kvar sak forklarar kommunedirektøren kvifor dette blir gjort.
«(Bakgrunn for saka) Forslag til ny arealdel av kommuneplan for Stord (KPA) vart av kommunestyret den 20.02.25 i sak PS 10/25 lagt ut på høyring og offentleg ettersyn. Høyringsfrist er 24. april 2025. I samband med revisjon av kommuneplanen sin arealdel for Stord er det gjennomført ein gjennomgang av alle gjeldande reguleringsplanar i kommunen. Gjennomgangen konkluderte med forslag om å oppheva 70 av 276 reguleringsplanar. Planar som er foreslått oppheva er vist i vedlegg til saka, og i eige kartlag i det digitale kommuneplankartet. Gjennomgangen av gjeldande reguleringsplanar er gjort i samsvar med vedteke planprogram for kommuneplanarbeidet (vedteke av kommunestyret 21.juni 2022) og forankra i plan- og bygningslova som set krav om oppdaterte planar, (jf. Pbl §12-4 og Pbl §10-1, 3. ledd.) I følgje pkt. 6.4 i Statlige planretningslinjer for arealbruk og mobilitet bør kommunen ved revidering av kommuneplanen sin arealdel vurdera om tidlegare godkjent arealbruk svarar til dagens og framtidas forventa behov, og gjeldande nasjonale og regionale føringar for arealbruk. Denne prosessen er populært kalla planvask. Nasjonale forventningar til regional og kommunal planlegging 2023-2027 peikar på omsyn som må vurderast i revideringa: «Ved revidering av kommuneplanens arealdel, vurderer kommunen om tidligere godkjent arealbruk skal endres av hensyn til klima, naturmangfold, kulturmiljø, jordvern, reindrift, klimatilpasning, samfunnssikkerhet og et hensiktsmessig utbyggingsmønster.» Plan og bygningslova (pbl) §12 gir føringar for oppheving av reguleringsplan: For utfylling, endring og oppheving av reguleringsplan gjelder samme bestemmelser som for utarbeiding av ny plan (§12-14). Det følgjer av dette at framlegg om oppheving av reguleringsplan skal sendast på høyring og leggjast til offentleg ettersyn (§12-10). Pbl. §12-14 fjerde ledd opnar for å delegera vedtak om å oppheva at plan som i det vesentlege er i strid med overordna plan. I Stord kommune er då utval for byutvikling vedtaksmynde. I slik forenkla prosess for oppheving er det ikkje krav om offentleg ettersyn, men grunneigarar blir varsla og får høve til å uttala seg før vedtaket blir gjort. Eit fåtal av planane som blir foreslått oppheva er vurdert til å vera i vesentleg strid med overordna plan, og vil difor ha forenkla prosess for oppheving.»