Førstkomande helg blir Teaterfestivalen på Stord arrangert i Stord kulturhus – ein av dei eldste scenekunstfestivalane i landet. Festivalen markerer i år sitt 40-årsjubileum og samlar barn og ungdom frå teatergrupper på Vestlandet og i Rogaland.
Deltakarar kjem denne gongen frå Askøy, Bergen, Haugesund og Stord, og i løpet av helga blir det heile 11 ulike framsyningar på scena i storsalen. Festivalen opnar fredag kveld med Spinae og stykket «MIROR MOROR», medan festivalarrangør Stord teaterlag går på scena laurdag morgon med «Familiemusikalen Peter Pan». Deretter går det slag i slag med framsyningar gjennom heile helga – alle opne for publikum.
Teaterfestivalen blei arrangert for aller første gong 13.–14. april 1985 som ein del av Barneteaterprosjektet i Hordaland. Den gongen peika Stord og Sunnhordland seg ut som eit kraftsentrum for barne- og ungdomsteater i fylket – ei rolle regionen framleis har. Vestland fylke har bidratt med driftsstøtte frå starten av, og i dag er festivalen koordinert av Stord kommune, medan Stord teaterlag har hatt rolla som teknisk arrangør heilt sidan oppstarten.
– Stord teaterlag er som å jobba med ein profesjonell aktør. Dei har lang erfaring, kjenner kulturhuset ut og inn, og stiller alltid med eit pågangsmot utan like. Eg vil tippa at Stord teaterlag er eitt av dei mest stabile frivillige teaterlaga i landet, seier festivalkoordinator Trond Onarheim. – Dei gjer ein imponerande innsats år etter år, saman med det tekniske laget, og skapar ei fantastisk ramme rundt festivalen.
Onarheim oppmodar folk i regionen om å ta turen til kulturhuset denne helga:
– Noko av det flottaste med festivalen er å sjå kor mykje dei unge skodespelarane trivst på scena – det smittar over på publikum. Her er det berre å innta kulturhuset heile helga!
