Ein av attraksjonane Geopark Sunnhordland har å visa fram på Stord, ligg i sjøkanten nedfor rasteplassen ved E39 på Digernes. Då geoparken etablerte seg på staden, engasjerte både dagleg leiar Brynjar Stautland og stordordførar (dåverande) Gaute Straume Epland seg for å få bygt eit toalettanlegg ved rasteplassen. Vegvesenet sitt svar var nei, diverre – med tilvising til at det vart lagt ned solide midlar i eit moderne «vegtoalett» ved E39 sør for Valestrand i Sveio.
Eit skilt ved E39 nokre kilometer sør for Heiane fortel at det er 900 meter til rasteplass og informasjon om Stord – medan det er 16 kilometer til veg-do i Sveio.
– Me skulle så absolutt hatt slik service å by vegfarande og geoparkbesøkande, så me får prøva igjen å få det til, seier Brynjar Stautland i ein kommentar til Stordront.no.
