– Me kjenner oss våryre og slepp like godt fem nye artistar til årets festival. Slik lyd meldinga frå Tysnes fest fredag ettermiddag. Dei melder vidare at ein herleg miks av sjangrar, stemningar og publikumsfavorittar no er klare for scena på Gjerstad, og at med dette byrjar programmet for 2025 å bli komplett.
Artistar som no er klare er Golfklubb, Vinni, Di Derre, TORA DAA og Izabell.
– Me jobbar hardt for at programmet skal ha noko for alle – og med desse fem artistane dekker me alt frå hiphop til moderne pop, rock og nostalgisk visepop. Me har framleis nokre godbitar på lur, men dagens slepp tydeleggjer kor stor breidde og kvalitet årets program har fått, erklærer festivalsjef Øystein Vaage.
– Me er utruleg stolte over å kunne tilby eit så mangfaldig program. Her er noko for kvar ein smak – frå nostalgi og allsong med Di Derre, til rå energi frå både TORA DAA og Izabell. Me er i rute, stemninga i festivalen er på topp, og det er rett og slett kjempegøy å sjå at programmet snart er komplett!
Foreløpig program for Gjerstad Konsertarena:
Torsdag: TBA, Stavangerkameratene, Hagle, Carina Dahl, Vassendgutane
Fredag: TAUS, Di Derre, TORA DAA, Vinni, TBA, TBA
Lørdag: TBA, Tom Jones (UK), Storm Weather Shanti Choir, Tobias Steen, Izabell, Golfklubb
