Først gjekk «dampen» i Sunnhordlandsruta mellom Bergen, Leirvik, Tittelsnes, Bjoa, Ølen og Skånevik. Så var det M/S «Sunnhordland» sin tur, før snøggbåtane overtok sambandet tidleg på 1970-talet. No varslar Skyss store endringar i dette tradisjonsrike ruteopplegget; Frå juli månad i år blir det slutt på anløp av Utbjoa og Ølen. Årsaka er melding frå Rogaland fylkeskommune om at det ikkje lenger blir ytt tilskot til snøggbåt til dei to stoppestadane i Vindafjord kommune (tidlegare Ølen i Hordaland).Rogaland har ytt 1,6 millionar til sambandet siste åra.
Skyss opplyser i brev til kommunane langs ruta at ein framleis vil drifta sambandet med tre båtar og kjem med forslag til delvis nytt opplegg. Av dette kan least at fartyet som per no har Ølen som kai for nattligge, blir flytta til Skånevik. Samstundes flyttarein eit farty frå Skånevik til Leirvik. Rutene blir tilpassa dette, slik at ein får best mogleg utnytting av fartya og minst mogleg posisjonskøyring som ikkje gjev eit tilbod til dei reisande.
Ruteendringa inneber følgande:
• Alle anløp til Ølen og Utbjoa er tekne ut.
• Første avgang går tidlegare frå Skånevik (ca. 20 minutt), Fjelberg (ca. 20 minutt), Sunde (ca. 5 minutt) og Ranavik (ca. 5 minutt). Framskundinga av anløp Borgundøy medfører at stoppet må flyttast til Tømmerkaien på Borgundøy (same kai som siste anløp på kveld) ettersom ferja ligg til kai på Borgundøy på dette tidspunktet. Reisande frå Skånevik, Ranavik og Sunde vil komme fram til Leirvik 5 minutt tidlegare enn i dag på denne turen (kl. 06:00).
• Ny avgang frå Ranavik/Sunde tilbake til Leirvik på ettermiddag alle dagar i veka.
• Reisande mot Skånevik vil måtte byte båt i Leirvik på vekedagane, med unntak av på den siste turen frå Bergen (kl. 20:10). På søndag vil tre avgangar til/frå Skånevik vere gjennomgåande. På laurdag vil det ikkje vere gjennomgåande båt, men gode overgangar i Leirvik for begge retningar på begge avgangane.
• Avgangar frå Skånevik på ettermiddag vil i vekedagane ha anløp av både Sydnes, Fjelbergøy og Borgundøy på vegen til Leirvik.
• Ny avgang frå Skånevik på laurdag (kl. 11:35) via Fjelberg og Borgundøy til Leirvik, med korrespondanse med båt vidare mot Bergen.