– Det har vist seg å vera skikkeleg «råtafjedl» der flytebryggja vart ankra opp utfor naustet på Sæbø gard. To gonger har bryggja slite seg, sjølv om festepunktet er bora lenger i fjellet enn det som plar vera vanleg. I tillegg har det vist seg å vera ein ekstra verhard plass. Dette er årsakene til at det no ligg føre konkrete planar om flytting til rolegare farvatn, seier rådgjevar innan fritid og idrett i Stord kommune Sylve Rusten.
Den nye ankringsplassen for den universelt utforma flytekaien med landgang, blir ved Sæbø gard sitt gamle kaianlegg lenger inn mot Alnavågen. Det skal byggjast ein rundt 150 meter lang ny tilkomstveg. Og som med kaianlegget som har vore ved søbænaustet, blir det nye ope til bruk for ålmenta. Byggemeldinga er levert.