Fitjar kommune, ved kommunedirektør Steinar Dalland og ordførar Wenche Tislevoll, har sendt melding til fylkeskommunen med klar melding om at heradet nord på Stordøy ikkje er fullnøgd med ferjefrekvensen i austevollsambandet. Fylket meiner noverande ruteproduksjon mellom Sandvikvåg og Husavik er ok, og vil vidareføra opplegget når det skal hentast inn nytt anbod på ruta frå 2030. Det er ikkje Fitjar kommune samd i, og kjem med følgjande tilrådingar:
• Med utgangspunkt i dagens trafikktal bør Sandvikvåg – Husavik ha minimum 15 rundturar både på vekedagar og i helg. I praksis betyr det to ekstra rundturar på vekedagar og inntil 6 ekstra rundturar på helg.
• Opningstider på sambandet må tilpassast slik at det også er mogleg å dagpendle for tilsette som arbeider i skift og turnus. Opningstida for sambandet må vera minimum 15 timar på vekedagar og i helg
• Det er etter Fitjar kommune sitt syn eit stort rom for å utvikla eit felles arbeids-, utdannings-, service- og kulturmarknad mellom Austevoll og Fitjar. I dag legg i realiteten ferjetilbodet avgrensingar for ei slik utvikling.
• Det er ikkje ønskjeleg at ferja tar pause midt på dagen.
• Det er viktig at Rogfast vert teke med i vurdering av framtidige behov.