Om det finst reglar for vedhogst, skal ikkje seiast for sikkert, men ein med sterk røynsle i faget meinte vedprosessen skulle leggjast opp med hogst i februar. Så skulle skiene/kubbane løast fint i la og få tørka ute fram til jonsok. Då skulle tørr ved i hus, inn i skuten.
Motivet knytt til desse orda, er henta frå Tveit på Huglo og viser at hogsten 2025 er godt i «i rute». Motivet gjer at det igjen er freistande å ty til ved-uttale frå ein svensk kjend multikunstnar . Han song opera, spelte fela i gamaldansorkesteret, han var blues-gitarist og meire til. På spørsmål om kva han likte beste å gjera, svarte han:
– Det kjekkaste eg gjer, er å hogga og lø opp ved! Dette fordi; – når eg spelar eller syng, dreg lydane frå meg, eg er takksame for applausen – men ser ikkje noko direkte resultat av jobben. Annleis når eg høgg ved. Ferdig med øksa og økta kan eg setja meg på hoggestabben og nyta synet av eit vakkert lødd ve’ala. Det gjer godt, det.