Tidlegare biskop, prest og forfattar Per Arne Dahl kjem til Stord 8.-9.mars skriv Stord kyrkje i ei pressemelding.
Dahl har vore tilsett ved Modum Bad i 15 år, vore biskop i Tunsberg, prest på Stortinget og i fleire kyrkjelydar. I 25 år hadde han ei fast spalte i Aftenposten; «Under åpen himmel», saman med teiknaren Ulf Aas. Per Arne Dahl har også skreve ei rekke bøker.
Når han kjem til Stord vil han tala over tema «Sårbarhetens kraft», «Nådens kraft» og «Håpets kraft».
Gjennom heile livet har Per Arne Dahl lytta til menneske som har det vanskeleg. I boka «Sårbarhetens kraft» skriv han truverdig og nært om korleis me kan leva med skjulte plager. Det krev mot å visa sårbarheit og det er avgjerande korleis me hjelper kvarandre når det røyner på. Like fullt kan sårbarheit gi oss ny styrke.
For mange kan livet til tider vera krevande. I temaet «Håpets kraft» ynskjer Per Arne Dahl å gi håp til alle som treng styrke og trøyst når det røyner på.
«Når det butter imot her i livet, trenger vi hjelp til å holde ut, og til å holde av hverandre», skriver Per Arne Dahl. «Vi trenger mer trygghet når vi er redde, og vi trenger noe å holde oss i når vi mister grepet.»
Me har med oss gode songkrefter. Laurdag 8.mars har me to samlingar i Leirvik bedehus. Kl.16.00 kjem Ragnhild Nesse, kl.19.00 kjem Bømlo Gospel. Sundag 9.mars vert det festgudsteneste i Stord kyrkje der koret Ichtus deltek. Sjå meir detaljar på plakaten og ta turen til Leirvik bedehus og Stord kyrkje 8.-9.mars.