Jagaren KNM «STORD» har ei sentral rolle Nicholas H. Møllerhaug si bok «Farmor og farfars krig», med undertittel «Ei krigsseglarhistorie 1940-2023». Det vart særs godt frammøte då boka blei presentert på Maritimt Museum på Nattrutekaien seint i haust, der mange tok seg tid til studie av minneveggen for jagaren som er montert i museet. Der heng no namneskiltet og diverse anna frå skipet, minne som i mange år hong i andre høgda i Rådhuset, godt synleg for besøkande.
Men ein viktig ting manglar i muse-samlinga: – Skipsklokka. Av oppslag i Sunnhordland 6. juli 1959 er det på det reine av skipsklokka og namnebrettet tilhøyrande jagaren vart overlevert på ordførarkontoret 2. juli 1959. Dette skjedde etter at KNM «Stord» vart selt til opphogging.
Kvar kan så skipsklokka vera vera? Stordront.no retta spørsmålet til kultursjef Anne Lene Østvold Jordåen. Ho svara:
«Dette har blitt ei gåta for oss – me er usikre på om skipsklokka er lagra her på kulturhuset, me har leita høgt og lågt men ikkje funne ho… me mistenkjer at ho ikkje er på kulturhuset, men har auga opne i tilfelle ho skulle dukka opp. Me har og vore i kontakt med rådhuset – men dei har ikkje funne klokka dei heller.
Enn så lenge forblir dette eit mysterium….»
Nokon som har tips i saka? Send gjerne nokre ord til tips@stordront.no
