Fire dagar forrige veke var det høg studieaktivitet i og kring gruvene på Litlabø. I gruvegangar (stollane) inni fjellet, i tårnet og heishuset og elles på anlegget hadde 60 geologistudentar med lærarkrefter interessante dagar. Studentane var delte i to gruppe, og etter kvart som dei oppdaga dei mange kvalitetar Venelaget for Gruo har lagt til rette for, vart det mange god takkens ord å høyra frå imponerte ungdomar.
Berre det å få oppleva ei «ekte gruve», og kunna sanka prøvar frå nokre av dei 14 ulike mineralane som er registrerte i Gruo, var ei oppleving å føra inn i plussmargen. Eit par geologistudentar ved UIB har teke master etter opphalda på Litlabø.
– Gilde ungdomar og kjekt for oss i dugnadsgjengen å høyra at det me har arbeidd for mange år får gode skussmål også frå yngre generasjonar. Det gir inspirasjon i den vidare drift, seier senior i venelaget, Ivar Helleland, om studiesamarbeidet med Universitetet. Det same gjer det faktum at Gruo på Litlabø har fått Unesco-status.
Tradsjonen tru, blir det «open dag» dag i Gruo 1. mai, med togtur inn i fjellet, med vandring i tårnet og anna kjekt. Alle hjartans velkomne, seier Ivar Helland.