Med sine 125 år i janitsjarmusikken si frivillige teneste, er Stord Musikklag mellom dei eldste aktive korpsa i landet. Når konferansier Jørn Olav Myhre under nyttårskonserten i Kulturhuset laurdag så spurde ut i salen om me nokon gong har høyrt musikklag spela betre enn no – vart svaret faktisk nei. Ikkje berre var det gilde musikknummer korpset med mange nye medlemer baud på, det var også presis staslyd frå alle ledd, ut til eit publikum som lytta stille og intenst, og takka for tonane med intens applaus. Altså: – Ein gledesspreiar av ein nyttårskonsert, der me også fekk nyta song frå Ingrid Leithaug Mjånes og smekre altsax-tonar frå Ole Jakob Hystad i to sterke jazzlåtar. Og me vart kjende med musikklaget sin nye dirigent Paul Hughes, som leia det heile med sikker taktstokk. I mars dreg det jubilerande korpset til NM i Trondheim, og me ønskjer lukke til, alt me kan.
Unge Vonas Tesfa entra scene- og gav med elegant sologitarspel ei solid stadfesting på at det gror godt i dei unge rekker i Kulturskulen. Godt levert.
Det er ein god tradisjon blitt, at ordførar og kultureining brukar nyttårskonserten til høgtidlege overrekking av kommunale prisar og stipend.
Etter tur bad ordførar Sigbjørn Framnes (FrP) og kultursjef Anne Lene Østvold Jordåen vinnarane koma på scenen og motta kunst, blomar og gode ord.: Målprisen til Gamle Fengselet Kulturhotell, Eldsjelprisen til Neeta Sankholkar, Kulturprisen til Marta Tveit og Jens Litlabø, Pris for godt tilgjenge til Stord Mental Helse og Kulturstipendet til Astrid Jordåen.