– Det beste me har høyrt frå Stordkoret? Spørsmålet vart stilt i rekka av nøgde publikumarar på veg ut av Stord kyrkje i kveldinga laurdag. Og svaret vart eit klart JA.
Så mykje vellyd frå koristane, sopransolist Ingjerd Kannelønning Kolstad og pianist/organist Noah Wibe og ein strykekvartett – at ein blei fanga i ei herleg julemusikkboble. Så var då også konserten «In dulci jubilo» ei musikalsk juleforteljing – med repertoar i fin blanding av kjende og litt mindre kjende musikkstykke, som på kvar sine vis speglar høgtida me går i møte. Frå starten med «Jeg synger julekvad», via m.a. «Mitt hjerte alltid vanker» og «Himlen i min famn», «Jul, jul strålende jul», til ei mektig avslutting med to stykke, «For unto us a child is born» og «Hallelujah» frå Händels «Messisas».
Då siste tone tagna, reiste publikum seg spontant og takka songarar, dirigent Liv Kari Bru og musikarar med sterk applaus – for den god opplevinga.