Parken med tribunen og nye benker og eit elles naturleg amfi , er ein for god og flott arena til å bli brukt 17. mai og ein gong til i løpet av året.
Den tillyste allsongen i Parken søndag vart på alle måtar så vellukka at det må spora tilskiparen til i alle fall ei, gjerne to, slike samlingar til før det igjen stundar til haust. Venelaget for Parken var arrangør, og leiar Reidar Lunde vart takksam i røysta når han helsa godt 200 velkomen til allsong i beste tidlegsommartemperatur som tenkjast kan.
Øystein Olsen tok over mikrofonen og leia programmet og allsongen vidare. Eige hefte (med stor og god skrift) var prenta opp i høve dagen.
Tribuneorkesteret sytte for rette tonefølgjet: Svein Losnegård, Kjell Aasheim, Nils Abrahamsen og Lorentz Kannelønning – og Endre Olsen. Han var også på gjesteartistlista, saman med Hanne Eldøy Isdal, Ragnhild Kambo, Nils Horn og Klangboltane. Humøfylte og særs godt røysteføre alle i hop. Nett som oss på benkene, om me skal tru konferansieren. Og det skal me.
Den vakre «Dråpa til Storden» (mel: Flicka från Backafall) med tekst av Einar Nilsen, avrunda ein kjekk ettermiddag i Parken.