Rivearbeidet av «gamleskulen» på Vabakkjen er i fullgang og det kan vera greitt å minna om kva bygg som kjem i staden.
Skissene er klare, og imponerande, for det som kan bli ein samla versjon av ny Stord vidaregåande skule på Vabakkjen. Enno ei tid må det skrivast «kan bli», fordi det fylkeskommunale vedtaket som gjeld går på riving av noverande og bygging av ny «yrkesskule». Ny superskule med uteareal og atrium skal vera klar til bruk hausten 2025. Det skal investerast rundt 500 millionar kroner i første byggesteg, som skal gje ein ny skulekvardag for 475 elevar og 100 tilsette. I byggeperioden held elevane til i AMO-bygget på Heiane og ein brakkeavdeling på Vikahaugane.
Nyeskulen blir eit luftig bygg i tre og mykje glas med vekt på universell utforming ute som inne. Link arkitektur har teikna, og Conso AS som har totalentreprisen gjer rekning med å bruka lokale underleverandørar etterkvar som arbeidet skrid på fram. Gjenbruk står sentralt i riveprosessen.