![](https://usercontent.one/wp/www.stordront.no/wp-content/uploads/2023/02/skotabergskaien_ambulansebaat_060223-1024x582.jpg)
Som ei mellombels ordning medan det blir bygt hotell på Nattrutekaien, ser Skyss Skotabergkaien som beste alternativet som lendingsstad for snøggbåtar i Sunnhordlandsruta.
Dette kjem fram i e-post trafikkselskapet har sendt hamnesjefen i Stord.
– Blir dette alternativet valt ser me behov for tilrettelegging av gangareal mellom Skotabergkaien og Leirvik bussterminal og leskur på kaien, om mogleg, skriv skyss. Og legg til :
– Bruk av Skotabergkaien føreset 70 meter ledig kaiplass. Planlagt ny flytebrygge (seilforeningen) kan ikkje ha farty liggjande på sida mot rutebåtane. Denne sida av flytebryggja må likevel vera fendra i tilfelle avdrift ved sterk vind. Det kan også bli trong for liggjeplass i hamneområdet utan om dei 70 metrane.
Med denne meldinga frå Skyss kvesser kampen om fronten på Skotabergkaien seg til: seilforeningen har planar om ny flytekai, ambulansebåten ønskjer halda på lendingsplassen dei har – og no kjem Skyss med ønskje om å etablera mellombels hurtigbåtterminal.