Skissene er klare, og imponerande, for det som kan bli ein samla versjon av ny Stord vidaregåande skule på Vabakkjen. Enno ei tid må det skrivast «kan bli», fordi det fylkeskommunale vedtaket som gjeld går på riving av noverande og bygging av ny «yrkesskule».
Rivinga tek til 16. januar i år og ny superskule med uteareal og atrium skal vera klar til bruk hausten 2025. Det skal investerast rundt 500 millionar kroner i første byggesteg, som skal gje ein ny skulekvardag for 475 elevar og 100 tilsette. I byggeperioden held elevane til i AMO-bygget på Heiane og ein brakkeavdeling på Vikahaugane.
Planar og skisser vart presenterte på eit opne møte i konsertsalen på Stord Vidaregåande onsdag kveld, for eit publikum som burde vore større når så store ting skal skje på Stord. Nyeskulen blir eit luftig bygg i tre og mykje glas med vekt på universell utforming ute som inne. Link arkitektur har teikna, og Consto AS som har totalentreprisen gjer rekning med å bruka lokale underleverandørar etterkvar som arbeidet skrid på fram. Gjenbruk står sentralt i riveprosessen.
Naboar til yrkesskulen som var på info-møtet likte godt å høyra Rune J. Vonheim frå Consto fortelja at den mykje brukte gangvegen frå Bandadalen ned anlegget skal leggjast litt om i byggjeperioden, slik at det blir gå og sykkelveg ned mot trafostasjonen og Fv 544.
Noko uvisse enno, når det gjeld tilførslevegen til skulen. Av trafikkale årsaker ønskjer kommunen å «flytta» avkøyringa frå fylkesvegen frå noverande kryss og byggja en fjerde arm på til rundkøyringa ved Circle K. Ei løysing det er kome motsegn til. Krefter har også jobba for at Stord vidaregåande skule i framtida bør få tilkomsten sin via E39 og krysset ved Kiwi i Studalen.