I tett snødrev på veg til ferjeavgang i Sandvikvåg, augnar me at motkomande køyrety har fått kvitt belegg over registreringnummeret.
– Då er det vel likt på eigen bil, og tanken som slår oss er: – Me har jo brikke og kva skjer dersom lesaren på toppen av ventefilene ikkje klarar lesa bokstavar og tal?
Det klarte då heller ikkje lesaren i snøtjukna denne gongen, men det ordna seg med betalinga då me kom litt ut på Selbjørnsfjorden. Gjennom det elektroniske billetteringssystemet fekk mannskapet melding om at det om bord på ferja var fleire bilar som ikkje var blitt avlest ved passering billettbua på land. Nettopp på grunn av klistresnøen på skiltet. Difor måtte mannskapet ta seg ein ekstrarunde på bildekket for å fjerna snø og fotografera registreringsnummer på nytt.
– Ikkje ofte dette skjer, berre når veret er på sitt verste, som i dag, sa mannskapet.